ظاهرة المعاكسات على المنتديات وعلى البريد الإلكتروني

من يومين لقيت إضافه عالإيميل الياهو الخاص بي من شخص ، النك نيم بتاعه مش مبين إذاكان ولد ولا بنت بس الصوره الرمزيه بتاعته بتقول إنه بنت ، ما علينا ، 
الشخص : السلام عليكم .
أنا : وعليكم السلام ورحمة الله وبركاته
الشخص : ممكن نتعرف
أنا : قوي قوي أنا محمد الجوهري وحضرتك
الشخص بعد فتره رد وقال : أنا عادل
أنا : أهلا وسهلا بيك ياترى جبت إيميلي منين ؟
الشخص : من طنطا أوفلاين
أنا : أهلا وسهلا ياعادل
الشخص : هو أنا لو عايز أعرف إيميل أي حد في المنتدى أعرفه منين
أنا : لو عايز تعرف إيميل أي حد بتبعتله رساله خاصه تستأذنه 
الشخص : أمممممم ومفيش طريقه تانيه
أنا : لأ مفيش
الشخص : طيب شكرا
ومشفتش وشه ولا سمعت حسه تاني خالص مع إنه داخل طالع على الميل ، طبعا كلنا نفهم من الحوار إن الأخ اللطيف كان مفكرني بنت وأخد إيميلي من توقيعي على أمل إنه يتعرف على بنت جديده وهلم جره ، ونفهم كمان إنه حاطط صورة بنت علشان يوهم إللي بيتعرف عليها إنه بنت ويعرف عنها كل حاجه وبعدين ياخد صورها ويستفزها بيهم ، أنا عايز أسأل سؤال واحد ليه بعض الشباب النهارده كل همه إنه يتعرف على بنت وياخد رقم تليفونها ويقابلها لو قدر لمجرد التسليه وبعد كده يدور على غيرها ، ليه الكدب والكلام بألف وش قدام الناس ، لما تقابل ربنا يوم القيامه هاتقوله إيه . ياريت ياشباب ويابنات إتقو الله في أفعالكم على الشات وعلى النت وللبنات بقولهم خدو بالكم من بعض الشباب إللي بيعملو إيميلات وهميه بإسم بنت وصورة بنت
ياريت ياجماعه أي حد يقرا الموضوع لا يكتفي بالمشاهده وياريت نتناقش في الموضوع ده ، وكمان البنات تقولنا إمتى أخر مره حد بعتلك رساله خاصه بيطلب فيها إيميلك ؟
وشكرا